أبو نجيب بالمظاهرة

يوميات أبو نجيب

أبو نجيب اللبيب أكبر تاجر سمك بالحي الوسطاني، قرر ينزل يشارك بالمظاهرات، مع انه أبو نجيب مش ولا بدّ يعني،، زنكيل، شافو واحد متظاهر من الحي التحتاني سأله:

– شو عمتعمل هون يا بونجيب؟ 
– أنا؟ ولا شي،، هيك متل ما شايف واقف مع،،  مع هالواقفين.
– بس هالواقفين مش واقفين، هودي متحركين هون ضد البنوكة، اللي انت واياهن ماكلين سوى بنفس الصحن.
– أنا هون عمطالب بحقوقي وحقوق المسمكة كمان ليش انت مفكرني مش من هالحي؟
 –  مبلى، بس هودي المتظاهرين ضدك وضد جماعة الحي الفوقاني اللي انت واياهون لهطّوا مصرياتهن وخليتوهن عالحديدة.
أنا؟ ،، الله يسامحك انا بامروأ  من جنب الحيط وبدي السترة،،، اذا نوّيت البسينة بانأز,, 
– سترة ؟ وبسينة؟ ليش انتو خليتوا سترة ولّا جاكيت والله بنطلون والله حيط لاقي والله ستر مخبى؟  بعتونا سمك بالبحر وخليتوا المسامك تشمت فينا..

– يه يه الله يسامحك:”انا طول عمري مع هالشعب والناس المظلومين،، لك لك هالحكيات، قلبي وعيوني وكلني معكن
-من أي متى هالحكي يا بو نجيب؟ نسيت النصبي اللي طرقتو اياها لأبو جودت أنت وجماعة الحي الفوقاني، وخليتوه يبيع اللي فوقو وتحتو ويفلّ من البلد؟ 
-انا مظلوم يا عمو  من هالتهمة، وحياتك أنا ما خصني هو قال بدو يسرق البنك  انا ما خليتو،، شو ذنبي اذا البنك سبقو وسرقو؟
_انت رحت وزّيت عليه وسلّطت عليه  قروش وحيتان البحر حتى خلّيت الجماعة يفترو عليه،، ويخلوه جلدة على عضمة.
– غلطان عمو انا ما بدي الا مصلحتكن ومصلحته لأبو جودت، بس هو خبّص شوي وما سمع الكلمة، وطيّر السمكات من إيدو،، فطلع بلوّشي.
وهلأ على مين جايي تتنأوز  وتنصب هون يا بو نجيب؟
-أنا والله بديني بولادي عمبتظاهر،، بس وحياتك، قلت بلكي حدا محتاج شوية دولارات صرفلو اياهن،، يعني بلبيه أحسن ما ينقطع،،، ليك؟،، ابقا مرّ عندي عالمسمكة نشرب فنجان يانسون سوى،، قلتلي شو اسمك؟
-إسمي جودت
آه افتكرت،،، ذكرني يا جودت أبوك مين بكون؟

إغلاق
إغلاق