أبو نجيب وورق التواليت من بكين لبرلين

أبو نجيب اللبيب على أساس إجا على المانيا جايب معه كم سمكة وحوت بدو يعمل صفقة ويبيعن، ما ظبطت معه!
لاقي الدنيا قايمة وقاعدة وكورونا شاغلة الدنيا، والمحارم وورق التواليت منفضّة عن الرفوف بالمحلات، مختفية.

لمحتُه من بعيد بشارع بمدينة كولونيا،،عابط صندوق كبير، وإدامه اتنين،  هجمت عليه بدي سلّم عليه ،، الي سنين مش شايفته، قاطعني وقال لي:”
إبقي عندك مطرحك بأرضك، أوعي تتحركي!
أنا:” يه،، معقول؟ الله يسامحك بدي سلم عليك بس، ولَو؟
أبو نجيب:” لا تسلمي علي ولا بسلم عليك”، خلينا هيك أصحاب من بعيد أحسن، أنا جايي أعمل صفقة محارم ورق، وفلّ بوجي قبل ما يسكروا المطار مش جايي أعمل علاقات  اجتماعية!
قلت بعقلي شو هالأبو نجيب هيدا!، أنا باعرفو مصلحجي ومع السوق بسوق، بس مش على علمي أنه مش  مسايرجي بالحكي، شو صاير جلف هالأبو نجيب،، !
قلتله ماشي يا بونجيب معك حق،،، والله الاحتياط واجب، على كل هالفيروس فرّق وجمّع بنفس الوقت، بس ما قلتلي ليش غيّرت المصلحة، شو خصّك بالمحارم وبورق التواليت انت؟ ما على أساس عندك مسمكة ؟
أبو نجيب:” شو شايفتيني غشيم؟،، السمك هلأ واقف سوقه، حدا بياكل سمك بهالأيام؟ ، والناس عاطلة عن الشغل ومخباية ببيوتها؟
أنا:” معك حق، بس قل لي ليش محارم وورق تواليت؟
أبو نجيب:”هلأ هون هيدا السوق اللي ماشي،، مش شايفة الناس أديش خايفة من كورونا؟،،كتّر خير الله ،
أنا: ايه بس شو خص كورونا بورق التواليت؟
أبو نجيب: عمتسأليني إلي، شو بعرفّني، انا باعرف أنه السوق ناقص ورق تواليت والعالم بعدها عمتهجم عليه،، منيح عندي حدا بالصين تلفنتلو شحنلي اياهن ديركت من مطار بكين لبرلين،،، وزّعت أول ضربة طارت بساعتين، رجعوا دقولي الجماعة هون، ونعمة كريم على كورونا،،  الله يديمك يا كورونا!

بالصور ،، أبو نجيب وصوره التذكارية مع ورق التواليت قبل ما يختفي عالمياً

 

 

 

 

 

 

الوسوم

مقالات ذات صلة

إغلاق
إغلاق